దానం… ఆగమాగం…
రేవంత్ పట్టించుకోవడం లేదా ?
పవర్ లేకుండా పవరున్న పార్టీలో మనుగడ కష్టంగా మారిందా?
కింకర్తవ్యం !
దానం నాగేందర్…
మూడు దశబ్ధాలుగా హైదరాబాద్ రాజకీయాల్లో పేరున్న నాయకుడు.
ఎప్పుడు ఏదో రకంగా వార్తల్లో నిలవడం ఆయన స్పెషల్.
ఆసిఫ్ నగర్ నుంచి టీడీపీ నుంచి ఎమ్మెల్యేగా గెలిచి రాజీనామ చేయడం… వైఎస్ఆర్ సీఎంగా ఉన్న సమయంలో కాంగ్రెస్ లో చేరి ఓడిపోవడం అప్పట్లో హాట్ టాపిక్…
ఇక తెలంగాణ ఉద్యమ సమయంలో లాఠీలతో ఉద్యమకారులను తరిమికొట్టి వివాదాస్పదంగా దానం నాగేందర్ వార్తల్లోకి ఎక్కారు.
ఏ పార్టీ నుంచి గెలిచినా.. ఓడినా.. ఆయన మాత్రం అధికారంలో ఉన్న పార్టీలోనే చేరడం ఖాయమని ముద్ర వేసుకున్నారు.
తెలంగాణ ఏర్పాటు తర్వాత బీఆర్ఎస్ లో చేరిన దానం నాగేందర్.. కొంత సైలెంట్ గా ఉన్నారు. కేసీఆర్ హాయంలో ఎమ్మెల్యేగానే కాలం నెట్టుకొచ్చారు. 2023 అసెంబ్లీ ఎన్నికల్లో బీఆర్ఎస్ నుంచి గెలిచిన దానం నాగేందర్… కాంగ్రెస్ రాష్ట్రంలో అధికారంలోకి రావడంతో వెంటనే మూడు రంగుల జెండా కండువాను మెడలో వేసుకున్నారు. అంతేకాదు.. 2024 పార్లమెంట్ ఎన్నికల్లో సికింద్రాబాద్ నుంచి ఎంపీగా పోటీచేసి బీజేపీ అభ్యర్థి కిషన్ రెడ్డి చేతిలో ఓటమి పాలయ్యారు. ఒక పార్టీ నుంచి పోటీ చేసి ఎమ్మెల్యేగా గెలిచి… మరో పార్టీ నుంచి ఎంపీగా పోటీ చేయడంపై బీజేపీ నేతలు స్పీకర్ కు ఫిర్యాదు చేశారు. దానం నాగేందర్ పై అనర్హత వేయాలని న్యాయస్థానం వరకు బీజేపీ నేతలు వెళ్లారు. కేసు కొనసాగుతోంది.
కాంగ్రెస్ పార్టీలో ఆయన చేరినప్పటి నుంచి ఏదో ఓ కాంట్రావర్శీ దానం నాగేందర్ ను వెంటాడుతూనే ఉంది. ఓ వైపు అనర్హత పిటిషన్.. దానం నాగేందర్ కు ఇబ్బందికరంగా మారింది. మరోవైపు సీఎం రేవంత్ ఆయన్ని లైట్ తీసుకొంటున్నారనే ప్రచారం జరుగుతోంది. ఇంకోవైపు హైడ్రా కమిషనర్ ఐపీఎస్ అధికారి రంగనాథ్ .. ఖైరతాబాద్ ఎమ్మెల్యే దానం నాగేందర్ ను టార్గెట్ చేశారని ఆయన వర్గీయులు గుసగుసలాడుకుంటున్నారు. ఒకవైపు అనర్హత కత్తి వేలాడుతోంది. ఇంకోవైపు చేరిన కాంగ్రెస్ పార్టీలో గౌరవం లేదు.. మర్యాద అంతకన్నా లేదు. వ్రతం చెడ్డా ఫలితం దక్కాలని అంటారు. పార్టీ మారినా… గుర్తింపు లేకపోవడంతో లోలోపల రగిలిపోతున్నారు. ఏం చేయాలో తెలియక ఆగమాగమవుతున్నారు. దానం నాగేందర్ పరిస్థితిపై ఆయన అనుచరులే జాలిపడాల్సిన దుస్థితి నెలకొంది.
ఖైరతాబాద్ నియోజకవర్గంలో కట్టడాలను హైడ్రా, బల్దియా అధికారులు టార్గెట్ చేసి కూల్చుతోంది. దానం దీనిపై సీరియస్ గా ఉన్నారు. సీఎం దావోస్ పర్యటనలో ఉన్నారు. రేవంత్ రెడ్డి వచ్చే వరకు రెండు రోజులు కూల్చివేతలు ఆపాలని అధికారులను ఎమ్మెల్యే ఓ దశలో బతిమాలుకున్నంత పని చేశారు. అయినా అధికారులు మాత్రం డోంట్ కేర్ అనడంతో.. లా అండ్ ఆర్డర్ ప్రాబ్లం ఇష్యూ వస్తుందని వార్నింగ్ ఇచ్చారు.
దానం నాగేందర్ ముందున్న కర్తవ్యమేంటి ? ఆయన నెక్ట్స్ ఏం చేయబోతున్నారు ? సీఎం రేవంత్ రెడ్డి దావోస్ నుంచి వచ్చిన తర్వాత దానంను పట్టించుకుంటారా ? అసెంబ్లీలో అనర్హత పిటిషన్ కత్తిని చూపి.. రేవంత్ తప్పించుకుంటారా ? దానంను వదిలించుకుంటారా ? మంత్రి వర్గంలో తీసుకుంటారా ? కాంగ్రెస్ లో దానం ఫ్యూచర్ ఉంటుందా ? అనే అంశాలపై క్లారిటీ రావాలంటే మరికొన్ని రోజులు ఆగాల్సిందే.
